esanroom  >>  กระทู้(ทั่วไป)ห้องอีสาน

เซิ้ง
    ............เซิ้ง ใส่ ผู้แทน.....................
....โอ เฮา โอ่ ศรัทธาเฮ่ โอ.............ขี่ไก่โป ติดดากผู้แทน
หัวคะแนนซื้อเสียง พี่น้อง..............พากันย่อง ดังเสิกดังเสิน
ผู้แทนเงิน ผู้แทนแม่จ้าง................ชายกะซ่าง หญิงกะคือกัน
สมองมัน ทั้งเหม็นทั้งเน่า..............ผู้แทนเก่า เอาแต่ความรวย
เฮาขายควาย มันขายพี่น้อง............ฟังเสียงฮ้อง คาดว่าพาโล
ป๊าดทิโธ้ ซื้อหัว ละ ร้อย.................เอาไปปล่อย หัวละเป็นพัน
สาระพันชวนไปเป็นแหร่ง.............ยกตำแหน่ง คนใช้ให้เฮา
พวกมันเอา เงินมาทุกมื้อ................มาหาซื้อ เอาสิทธิ์เอาเสียง
คันไผเถียง ขวางทางวางท่า..........มันกะด่า กะแดกกะดัน
เคียดให้มัน ขี้หด ตดแตก...............พออยากแบกไปเซิ้งบั้งไฟ
โยนลงใน บวกควาย ขวยขี้.............คึดถี่ถี่ เป็นตาอยากหัว
มันมาตั๋ว ฮ้อยคราว ซาวอย่าง..........เฮากะซ่างไปเชื่อความมัน
พออยากยัน มันลงขุมขี้...................สมพื้น นี ความโงของคน
พากันทนมาฮอดมื้อนี่.....................ให้เขาขี่หลังอยู่คือควาย
ให้คนรวย มันจูง มันลาก................เขาไปฝากซื้อจ่าย ขายกิน
เคยได้ยิน โบราณ แน บ่..................ว่าซื้อพ่อ ซื้อแม่มันนำ
ผ้าขาดจำ จนเห็นฮูดาก...................ความทุกข์ยาก มันมาแต่ไส
คนจัญไร เทียวขายเทียวซื้อ............ซ่าง บ่ จื่อ บ่จด บ่ จำ
โอ้ หมอลำ ล่ะน้อ ด่อโด่..................ไผอยากโง่ ให้ขายคะแนน
ให้ผูแทนซื้อเสียงพี่น้อง..................เอาใส่ข้องหน่วยใหญ่ ไปขาย
มีกำไร เป็นแสนเป็นล้าน..................พวกชาวบ้าน ทั้งชาติขาดทุน
มันกินบุญ เฮาได้กินบาป..................ปานถึกสาป จากพระยาแถน
เห็นผู้แทน ปานเห็นผีปอบ...............มันมาจอบกินตับ กินไต
กินเครื่องใน ใส้พุงพ่อแม่................เป็นมาแต่ ตาปู๊ บูราณ
อีก บ่นานมันกินฮอดขี้.....................เป็นจั่งซี้ แหละพวกนายทุน
โอ่ เฮาโอ่ เฮาโอ้ เอาโอ.................ป๊าดทิโท้ ผู้แทนผู้ถอก
มันสิหลอก ไปโดนปานใด..............พวกจัญไร เทียวขายเทียวซื้อ
พากัน จื่อ แน บ่ น้อคน...................หรือสิ สนแตเงินเขาจ้าง
มัน บ่ต่าง กับขายเจ้าของ...............รีบไปจองโคกผีป่าช้า
เอาไว้ถ่ายามเมื่อ ขาดใจ.................ผู้แทนไถจนถึงกระดูก
ไถฮอดลูก ฮอดหลาน ฮอดเหลน......ไถจนเอ็น เฮาขาดสามท่อน
ไถแต่หง่อน จนฮอดฝ่าตีน..............ผู้แทนกิน จนหมด ออดหลอด
บ่ เหลือฮอด ขี้เพี้ย ในพุง...............ลาแล้วลุง อาว อา ป้าแม่
จำไว้ แน กาพย์เซิ้ง ทิดโส(ด) ........โอ่ อะ โอ เฮาโอ้ เฮาโอ........


.........เซิ้ง....ใส่ สภา.......
.......จ่ม นโม สามจบ ครบเครื่อง.........สิเว้าเรื่อง แต่เก่าเฮามา
ตั้งสภา อยู่เมืองบางกอห.....................หลวงเพิ่นบอกให้เลือกผู้แทน
ลงคะแนน เอาคนเพิ่งได้......................เอาไว้ใช้ ตางหน้าง ตางตา
เข้าสภาโต้เถียงเรื่องใหญ่....................เอาไปไล่ เรื่องการปกครอง
แบ่งเป็นกอง สองซุมอยู่ฮั่น..................ซุมหนึ่งนั้น เป็นรัฐบาล
บริหาร ปกครองประเทศ....................ให้เฮ็ดเวียก ช่วยชาวประชา
ไปจัดหาเงินทองของใช้......................ดูแลไพร่ ให้สุขสำราญ
ปราบคนพาล นักเลงหัวไม้...................เอาใจใส่ เรื่อง บริหาร
ราชการทั้งหลายใหญ่น้อย...................ต่างกะซ่อย รับ นโยบาย
ตามความหมายกระทรวง หลวงบอก....จากบ้านนอก จนฮอดในเมือง
อย่าให้เคืองเจ้านายใช้สั่ง.....................ทำทุกอย่าง เพื่อราษฎร
นี่คือ ตอนของซุมที่ หนึ่ง.....................แล้วกะจึ่ง เว้าซุมที่สอง
ตามทำนองระบบระเบียบ....................ซุมสองเปรียบ เป็นผู้ตรวจการ
คอยประสานเส้นสายปลายเชือก............คนเขาเรียฝ่ายค้าน สภา
เทียวตามหาคนโถงโกงชาติ.................แล้วประกาศคัดค้านงานโกง
จุดประสงค์ปราบคอรัปชั่น...................บ่ ได้หวั่นกับอันตราย
บ่ย่านตาย ยามจายามเว้า......................หมาหัวเน่าเอาแต่สินบน
พวกหัวคนสืบหาโตเลข........................เอามาเขกกันในสภา
ตั้งข้อหา ว่าโกงกินชาติ........................เงินทุกบาท ของ งบประมาณ
เอาไปผลาญ ไปผันมันโพด...................มันมีโทษเพราะเป็นเงินหลวง
เป็นเงินปวง ประชา ทั้งชาติ.................พวก อุบาทว์ รัฐมนโท
มีโมโห ยามเพิ่นถูกสอบ........................ลุกขึ้นตอบ ตาเหลือกตาลาน
บอกว่างาน นี้ใสสะอาด........................แต่ะฟาด ยี่สิบเปอร์เซ็นต์
อ้างว่าเป็น ค่าคอมมิชชั่น.....................คนฟังสั่น หัวออก อาการ
แท้กะงาน คนคอรัปชั่น.............ดั่งสนั่นไปทั่วแผ่นดิน
คนได้ยินเขาสาปเขาแช่ง...........พวกยาดแย่ง เงินงบ
โดย: [0 3] ( IP )
Add to Facebook  Add to Twitter  Add to Multiply  Add to Google  Add to Blogger  Add to Live

ความคิดเห็นที่ 1
   ประมาณ
อีก บ่ นานมาสมัครใหม่.............เพิ่นท่าใหญ่ ปานแฮ้ง คอคำ
คนย่างนำพอสิบพอฮ้อย.............เอาเงินอ่อย พวกหัวคะแนน
ไปตั๋วแทน ซุมโถงโกงชาติ........มันบังอาจ ตั๋วประชาชน
ซุมคนจน แฮ่งจน แฮ่งแจบ.........ถึกเขาแอบ ให้เชื่อความเขา
ให้เลือกเอาผู้แทนแถนแต่ง.........มีตำแหน่งเป็นรัฐบาล
ว่า บ่ นานพวกเจ้าพี่น้อง.............สิได้คล้องสายสร้อยทองคำ
ลุงทิดหำ หัวคะแนนใหญ่...........เอิ้นไปไส่ พ่อลุงทิดทา
ถามว่านา เจ้าจำ จักบาท..............ฟ้าวพาญาติไปลงคะแนน
เอาผูแทน คนลือมือใหญ่.............เพิ่นสิไถ่ นาให้พ่อลุง
บอกหมดฝุง ซุมคนเป็นหนี้.........ว่ามื้อนี้ มาบอกเอาบุญ
นา บ่ สูญ เงินเฮากะได้................ผู้แทนใหญ่ รัฐมนโท
เพิ่นไป โส สภามาแล้ว.................แม่ใหญ่แก้ว บอกลูก บอกหลาน
ว่า บ่ นาน ผู้แทนผู้ถอก................มันมาบอกว่า สิให้เงิน
มาประเมิน ใช้สิน ใช้หนี้.............ให้คนที่ เป็นหนี้จำนอง
พ่อใหญ่ทอง ฮึดฮือ พือผ้า...........บักใด๋ซ่า บ้า บ่ พอปัว
มันสิตั๋วไปฮอด ไส น่อ.................เห็น พ่อแก่มึง อยู่กลางดง
คึดว่าหลงกล มันซั่นตี้.................เชื่อท่อ ขี้ นี่หละบักหำ
กูโลดจำ โลดเข็ด โลดหลาบ........มันมากราบกูหว่างปีกลาย
ตั๋วไปหลาย จนลืมความเว้าเว้า....ลืมความเก่าว่าตั๋ว อีหยัง
เป็นตาซังผู้แทนแผนใหญ่...........ท้องเพิ่นไข่ ปานอึ่งยามฝน
เห็นหัวคน ปานว่าหัวทาส...........มันประกาศซื้อซะ ซื้อซาย
เว้าไปหลาย แฮ่งเป็นตาเคียด.............กู...ขี้เดียดผู้แทนขี้โกง
คันไผหลงความมันปั้นแต่ง...............ปานถูงแช่งให้เกิดเป็นลิง
พวกผู้หญิง ผู้ชาย ผู้ส่อน...................ถูกเขาหล่อนจนหมดหนังหัว
มันไปตั๋วพระสงฆ์องค์เจ้า..................ปากกะเว้า ว่าสิทำบุญ
บอกเจ้าคุณ สิซ่อยซ่อมโบสถ์..............ขอให้โปรด บอกญาติบอกโยม
สิมาโฮมเป็นเงินเกือบล้าน...................บอกไท บ้านซ่อยแน่ ญาคู
คิดเบิ่งดู้ พระยังถึกหลอก...................พวกพ่อ ออก แม่ออกบอกกัน
ไปจังหัน เห็นผู้แทน บ่.......................เพิ่นหลวงพ่อบอกให้เลือกมัน
เบอร์ สำคัญ ท่อนั้นท่อนี้....................ตาเพิ่นตี้ ท่อหน่วยหมากตาล
ตั๋วสมภาร แล้วเปิด ออดหลอด...........บ่ เห็นฮฮดดินไหง่ ไอผง
โส ตกลงเงินเลย บ่ ได้.......................อีพ่อใหญ่ กั้งโกบเป็นหงอน
น่าสะออนผู้แทนแถนแต่ง...................ให้เสาะแร่งกันเบิ่งเด้อคน
เซิ้ง มาโดน ขอลาป้าแม่......................ฝากไว้แน กาพย์เซิ้ง ทิดโส(ด)


โดย: ผอ. [6 มิ.ย. 54 16:49] ( IP A:49.228.252.40 X: )

ความคิดเห็นที่ 2
   มาฟ้อนใส่ เซิ้ง อิอิ สุดยอดไปเลย

ผู้แทนเป้นจั้งงีี้หมดบ่อหื้อ ๕๕
โดย: ปัทม์ [7 มิ.ย. 54] ( IP A:101.108.13.135 X: )


คลิก เพื่อเปลี่ยนกลับไปแสดงความคิดเห็นแบบเดิม
ชื่อ / e-mail :    แทรกไอคอนน่ารักๆในข้อความ
e-mail :
ส่งอีเมลทุกครั้งที่มีการตอบกระทู้       (ใส่ Email เมื่อต้องการให้ส่ง Email เมื่อมีคนมาโพสในกระทู้)
รหัสส่งข้อความ
กรุณายืนยันรหัสส่งข้อความ


วิธีการ upload รูปภาพแบบใหม่ วิธีการใส่ copy paste หรือ คัดลอกข้อความ ในแบบใหม่

คลิกที่นี่เพื่อกลับหน้าบ้าน